PMEG

37.2.3. E-finajho

La vortfara uzo de la finajho E tre similas al la uzo de A-finajho.

E = “rilate al la afero, tiel kiel la afero” k.s.:

  • tajlore = tiel kiel tajloro, rilate al tajloro

  • krajone = tiel kiel krajono, simile al krajono, per krajono

  • labore = rilate al laboro, per laboro

  • blanke = tiel kiel la koloro blanko

E-vortoj el ecaj radikoj «

Kiam la radiko de E-vorto havas ecan signifon, la E-vorto normale montras manieron. Tiaj E-vortoj ne multe varias lau la kunteksto:

  • veturi rapide = “veturi kun alta rapideco”

  • strange granda = “granda en stranga maniero”

  • rughe farbita = “farbita per rugho”

E-vortoj el ne-ecaj radikoj «

Kiam la radiko de E-vorto ne havas ecan signifon, la E-vorto montras diversajn signifojn depende de la radiko kaj depende de la kunteksto:

  • reghe konduti = “konduti en maniero karakteriza por regho”

  • reghe richa = “tiel richa kiel regho, richa en regha maniero”

  • loghi urbe = “loghi en urbo”

  • okazi tage = “okazi en tago”

Se la radiko havas agan signifon, la E-formo povas signifi “rilate al la ago, karakterizate de la ago” k.s. La signifo ofte estas simila al ANT-participo au INT-participo kun E-finajho:

  • konduti time = “konduti kun timo, karakterizate de timo, montrante timon, timante”

  • zorge esplori = “esplori kun zorgo, zorgante, zorgeme”

  • morte danghera = “tiel danghera ke estas risko de morto”

  • morte malami = “malami ghis la morto”

Aga radiko sed eca signifo «

Che iuj E-vortoj, la signifo iafoje estas maniera, kvankam la radiko estas aga:

  • Mi parolas en ghi [= la Franca lingvo] sufiche *korekte* kaj facile.M.57...sufiche senerare...

Tia uzo estas evitinda. Legu pli detalajn klarigojn pri tiaj vortoj kun A-finajho.