IG-verbo el IGH-verbo «

Principe oni tute rajtas aldoni IG al verbo kun IGH-sufikso. La senco de tia IG-verbo estas kauzado de tiu ago, kiun esprimas la IGH-verbo: Li [= Dio] senkuraghigas la chefojn de la popolo de la lando [...] kaj Li shancelighigas ilin kiel ebriuloj.Ij.12 = Li igas ilin shancelighi kiel ebriuloj. La chefoj shancelighas. Dio kauzas tiun shancelighadon. En la praktiko tiaj IG-verboj tamen estas ekstreme maloftaj.

Iafoje oni faras IG-verbon, kiu lausence estas bazita sur IGH-verbo, sed kiu tamen ne enhavas IGH. Oni povas diri, ke IGH estas ellasita por simpligi la vorton: Rajdmilicanoj formovigis la publikon. = ... formovighigis la publikon. = ... igis la publikon formovighi. Oni trovas tian uzon ankau che Zamenhof: Ili ruligu min kiel kortegan kurieron.Rz.68 = Ili igu min rulighi. / Ili igu mian kaleshon rulighi. Ankau tiaj IG-verboj estas tre maloftaj. Ili povas esti miskomprenataj. Vidu tuj chi-poste pri la ordinara uzo de IG post objekta verbo.

Oni notu la subtilan diferencon inter formovi kaj formov(igh)igi. Se oni formovas ion, oni mem rekte plenumas la movadon. Se oni formovighigas ion (igas ion formovighi), la kauzado estas malpli rekta. Oni iel influas ion por ke tio mem movighu. En la chi-antaua ekzemplo kun rajdmilicanoj, la milicanoj kredeble ne propramane movis la publikon, sed per timigado au simile igis la publikon mem movighi for. Simile subtila estas la diferenco inter shanceli kaj shancelighigi en la chi-antaua zamenhofa ekzemplo. En la praktiko oni preskau chiam preferas uzi igi kiel memstaran verbon por esprimi tiajn sencojn: Li igas ilin shancelighi. / Rajdmilicanoj igis la publikon formovighi. Tio estas plej ofte rekomendinda, char multe pli klara.