8.2.1. Nombro che radikoj kaj kunmetajhoj

Radiko povas montri jen unu aferon, jen plurajn aferojn:

• okula = rilata al okulo au okuloj. La radiko OKUL mem ne esprimas ian nombron.

• okule = rilate al okulo au okuloj

• okulkavo = kavo de okulo

• okulkuracisto = kuracisto de okuloj

• kolora = havanta unu au plurajn kolorojn

• samideano = ano de la sama ideo au de la samaj ideoj

• marteli = bati per unu martelo au per pluraj marteloj

• libroverkado = verkado de libro au libroj

Oni do ne uzas J-finajhojn ene de kunmetitaj vortoj. Oni ne diras: *okulojkuracisto*, *librojvendejo*, *shipojhaveno*, *senharojigi* au simile, sed okulkuracisto, librovendejo, shiphaveno kaj senharigi, kvankam temas ja klare pri multe-nombraj signifoj: kuracisto de okuloj, vendejo de libroj, haveno por shipoj, forigi harojn.

J-finajho povas tamen aperi en kunskriboj kiel membroj-abonantoj.

Grupaj radikoj kiel FAMILI (aro da parencoj) kaj ARME (aro da soldatoj) montras chiam multe-nombron de tio, el kio konsistas la grupo, sed ili ne per si mem montras, chu estas unu au pli ol unu tia grupo:

• familia = rilata al familio au familioj (rilata al unu aro da parencoj au al pluraj aroj da parencoj)

• armea = rilata al armeo au armeoj (rilata al unu aro da soldatoj au al pluraj aroj da soldatoj)