27.3.4. I-verboj – shajne pluraj objektoj

En frazoj kun I-verbo ofte povas shajni, ke estas pluraj objektoj kun malsama rilato al la chefverbo. Tio normale estus eraro. Uzi plurajn objektojn de la sama verbo estas eble nur kiam ili ludas la saman rolon.

Ofte unu el la supozataj objektoj vere estas objekto de la I-verbo, ne de la chefverbo:

• Kiu do instruos vian filon timi diojn [...]?Rt.44 Vian filon estas objekto de instruos. Diojn estas objekto de timi.

Ofte unu el la supozataj objektoj estas ghuste la I-verbo. En tiaj okazoj la I-verbo ofte ne estas vera objekto, sed ekz. pri-komplemento, sed antau I-verbo oni chiam forlasas la rolvorteton pri. Alia eblo estas, ke la alia supozata objekto ne estas vera objekto, sed N-komplemento:

• Mi volas, ke oni min helpu forigi la erarojn, kiujn mi faris.DL.11 Forigi shajnas esti objekto de helpu, sed ankau min shajnas esti objekto de la sama verbo. Oni povas diri, ke min ne estas vera objekto, sed ke la N-finajho nur anstatauas la rolvorteton al. Alternative oni povas diri, ke forigi ne estas objekto, sed ekz. pri-komplemento.

• Mi petas vin sidighi, sinjoroj!Rz.88 Kaj vin, kaj sidighi povas esti rigardataj kiel objekto, sed sidighi ankau povas esti klasata kiel pri-komplemento, kaj vin povas esti rigardata kiel N-komplemento (la N-finajho tiam havas la signifon de al).

Vidu ankau la klarigojn pri verboj kun alternativaj frazkonstruoj.