PMEG
39.1.30. OZ
Ekssufikso en multaj medicinaj kaj botanikaj nomoj de malsanoj: sklerozo, mikozo, koniozo, iktiozo, leukozo, bakteriozo. Shajnsufikso en multaj vortoj, kie la origina signifo estis “plena, hava, richa” au simile: furioza, grandioza, celulozo, mukozo.
Vera sufikso «
1. “Malsano, difekto, perturbo”. Malofte uzata kiel vera sufikso: viruso → virusozo = “virusmalsano”, fungo → fungozo = “parazita malsano kauzita de fungoj, mikozo”. Normale oni uzas internaciajn nekunmetitajn radikojn, sed ofte la internacia vorto ankau povus esti Esperanta kunmetajho, char la radikoj estas samformaj: nervoza, psikozo, acidozo, leukocitozo. Shajnas preferinde kiom eble uzi kunmetajhojn kun “malsano”: virusmalsano, fungomalsano k.t.p.
2. “Plena, hava, richa”. Siatempe iom uzata kiel vera sufikso pro influo de la lingvo Ido: sablo → *sabloza* = “richa je sablo”, poro → *poroza*, suko → *sukoza*. Nuntempe oni uzas kunmetajhojn kun HAV, PLEN kaj RICH au simplajn A-vortojn sen sufikso: sabloricha, sabla, porhava, pora, sukoplena, suka.